ضحكة العمر [Original]

يا ضحكة العمر .. يا الاول و يا التالي
يا سيّد القلب و انت العشق و اسبابه

يا غـايتـي مطلب الخفّــاق يا الـغالي
يا كل عمـري و لقـلبـي اقرب احبابـه

اهواك اهواك وانت بس تحلالي
من بعدك القلب سكّـر كـل أبــوابــه

ما هـزنـي عــذل عـذّالك و عــذّالي
عارف غلاتــك و حبّـك انت ادرى بـه

كيفي و ذوقي و وحدك بس تحـلالي
سيـّد مزاجي و قربك احسب حسابه

لا شفت وجه القمر وجهك تهيّـا لـي
و انتـه سمــا والا غيـرك غيـم سحّابه

حبيب عمري في حبك يا هنيـا لي
و من كان قبلك تصدق ما اعترفنا به

سـرقت قلبي و لا تسألني عن حالي
حالي يسـرك و قلبي انت أولى بـه

انت الذي اتمنـى شـوفــه قـبــالـي
يا من عشـانه حسـدت أهله و قرّابه

اشتـاق شوفك يا نور العين و كحالي
و العيـن دايم لشوفك حيـل طلابـه

محـد غيـرك شغـل عـقلي شغل بالي
و غيرك حبيبـي غرامي ما تهنّـا بــه

اشوف بك حب سامي و منزله عالي
و الحب غـالي لغيـرك ما رخصنا به