Passione
Enrico Tagliaferri
Cchiù luntana mme staje,
cchiù vicina te sento.
Chisá a chistu mumento
tu a che pienze, che faje.
Tu mm'hê miso 'int' 'e vvéne,
nu veleno ch'è doce.
Num me pesa 'sta croce
ca trascino pe' te.
Te voglio, te penzo,
te chiammo,
te veco, te sento,
te sonno.
E' n'anno,
ce pienze ch'è n'anno
ca st'uocchie nun ponno
cchiù pace truvá?
E cammino, cammino
ma nun saccio addó' vaco.
I' stó' sempe 'mbriaco
e nun bevo maje vino.
Aggio fatto nu voto
â Madonna d''a neve,
si mme passa 'sta freve,
oro e perle lle dó'.
Te voglio, te penzo,
te chiammo,
te veco, te sento,
te sonno.
E' n'anno,
ce pienze ch'è n'anno
ca st'uocchie nun ponno
cchiù pace truvá?
E' n'anno,
ce pienze ch'è n'anno
ca st'uocchie nun ponno
cchiù pace truvá?
