A virrinedda
[Testo di "'A virrinedda"]
Accattari vurria 'na virrinedda
Di notti la to porta spirtusari
Vidiri gioia mia quantu si' bedda
Quannu ti spogli prima di curcari!
E temu ca nun fussi accussì bedda
Ca l'occhi nun m'avissiru annurvari
Lassa la porta misa a spaccazzedda
Ca iu stanotti ti vegnu a truvari
E 'na varcuzza banneri banneri
'Sta dia d'amuri nni vinni a purtari
Ridìanu tutti li cilesti sferi
Trimavanu li specchi di lu mari
Binidittu lu Diu chi ti manteni
Ca accussì bedda ti vosi furmari!
Spampinanu li sciuri unn'è ca veni
L'ariu tribulatu fa sirinari
Avia li trizzi di 'na Mantalena
'Ntesta si miritava 'na curuna
Nni la to casa nun cci sta lumera
Lu lustru lu fa' tu, stidda Diana
Catina ca mi teni 'ncatinatu
Catina chi 'ncatini l'arma mia
Beni ti vogliu cchiù di lu me ciatu
Accussì criu ca vo' beni a mia
