Es riise Theater

Schue zue, Türe uf, einisch düreschnufe, zLiecht geit us und i bi scheisse ufgregt.
Eigentlech hani Franz nid gärn, guet, muess nid viu sägä, cha hocke u läbä.
Jede Momänt mit dere Gmeinschaft wo Fründschaft u Feindschaft zämäbringe u
zäme öppis ufd Bühni bringe, wo mi berühert, verfühert, mi laut la dänke ohni züberlege
u si schänke mir, was I nid gnue cha pflege.
Fründschaft, Musig, Theater, i au däm... Theater
Jede Abe Chaos, hüt, morn, gester, speter, nie, aus koordiniert, fantasiert u glich improvisiert,
mit Härzbluet u Liideschaft es Lied ufd Bühni komponiert wo so vergänglech isch,
morn verbi, hüt scho gsi, ä Troum, ä Momänt, ä Erinnerig.

Füf Mau id Haue loufe, vorbereite, u sech verchoufe, sech verliere u gniesse, es het nid lang,
aber es het hert, drvo loszlah u zrügg i Autag zgah.
U ds wo blibt, si dLüt wo gester u hüt für morn blob, mit mir Gschicht schribe, zäme, allei,
aus eis, zwöi, drü, vier, füf oder no viu meh, zämästah u däm Troum nachegah,
es isch viu meh aus es Theater, merki, wemer dr Kater am Morge wieder usem Bett hiuft
u i stah täglech im Schiuf, bisi wieder ir Haue stah, öich gseh, u cha la gah.
U jedes mau chunnt mir i Sinn, dir blibet, für immer, hie drin!
Gian Trachsu, März 2020