Anamikas Anamveera
KUSUMAGRAJ, VASANT PRABHU
अनाम वीरा जिथे जाहला तुझा जीवनान्त
स्तंभ तिथे ना कुणी बांधला पेटली न वात
अनाम वीरा
धगधगतां समराच्या ज्वाला या देशाकाशी
जळावयास्तव संसारातून उठोनिया जाशी
अनाम वीरा
मूकपणाने तमी लोपती संध्येच्या रेषा
मरणामध्ये विलीन होसी ना भय ना आशा
अनाम वीरा
जनभक्तीचे तुझ्यावरी नच उधाणले भाव
रियासतीवर नसे नोंदले कुणी तुझे नाव
अनाम वीरा
जरी न गातिल भाट डफावर तुझे यशोगान
सफल जाहले तुझेच हे रे तुझेच बलिदान
अनाम वीरा
काळोखातुनि विजयाचा ये पहाटचा तारा
प्रणाम माझा पहिला तुजला मृत्युंजय वीरा
अनाम वीरा
