Bierzelt

Leit, heid is' endlich so weid,
seit wochen hamma uns drauf gfreit
Heid geh i, so vui is gwieß
Auf unser scheene volksfestwies

Im dorf da heard ma d'musi scho
Da wirt zapft's erste fassl o
Japaner, preißn und franzosn
Zoang stoiz ihre lederhosn

de irmi im ihrm dirndlgwand
de drogt zweif massen umanand
sie steid ma oane her an disch
de anni bringt an steckerlfisch

wia soist do ned zfrieden sei
bei der ganzen schlemmerei
mit bierbedingtem schleierblick
fehlt mir grod gor nix zu meim glück

Es merkt, mit 3,4 mass im gsicht
Da jupp wia ean da hafer sticht
Is sonst a ganz a schüchterner
Doch sonst is er a nüchterner

Mit ungehemmtem selbstvertraun
Macht er der vroni scheene aung
De waar a durchaus intressiert
Wenn nur ned mitm hans liiert

Zu spät! Da hans kimmt zruck vom klo
Sei bluatdruck steigt glei merklich o
Der jupp draht eam an buckl zua
Und flirtet no in aller ruah

Der hans strickt d'hemadärmel nauf
Und streicht eam glei a gscheide auf
Doch des lasst lich der jupp ned gfoin
Und packtn glei bei da gürtlschnoin

Bevor de vroni schlichtn kon
liegt der maßkruag scho am bon
Der obazde fliagt mit effet
Der leni in ihr dekollete

Ihr markdurchdringendes organ
Ruaft den sepp jetz aufn plan
Heroisch stürzt er sich ins g'fecht
Weil er bei ihra landn mecht

So wird aus dera streiterei
A echte bierzeltkeilerei
Nach alle seiten broat sichs aus
Scho fliagt da oa aufd wiesn naus

Ned jeder woas no so genau
Den grund für diesen mordsradau
Doch einglich is' bedeutungslos
Da eifer is recht groß

D'japaner ham grod dirigiert
Jetz sans aufs höchste fasziniert
Und filmen mit geübter hand
Die sitten in dem fremden land

ganz amüsiert schau i in ruah
vom platz aus dem geschehen zua
und bstell mir zu dem riesenspass
glei no a dritte maß