قطر الحياة

في كل لفة عقرب ساعة عمري بيتسرسب بيعدي
الناس والدنيا بتتغير، حتى الحديد بيصدي
وأنا الوحيد واقف مكاني ثابت
في ناس إختارت سكة صابت
ناس ثانية إختارت سكة خابت
إحساس قاسي وصعب لمّا الناس تشوفك فاشل
أبوك وأمك وإخواتك وأصحابك شايفينك عاطل
قوم يا إبني إسعى وحاول
والله غلبت أحاول
ياما حاولت وقبل الجول ما ييجي يطلع فاول
ما عنديش مهارة أو حتى كوسة وحوستي حوسة
ودست بعد آخر البنزين بدوسة
في كل مقابلة شغلانة يتقال لي لف نفسك بشهادتك
مدد بجنب أي حيط وخدلك بوسة

رجعت فلاش باك حسبت سنين عمري ثلاتين سنة لقيت
حسبت ثاني وثالت وإتخضيت
ببص في المراية كام شعراية بيضة لقيت
وأبويا هو اللي لسه بيصرف ع البيت
بتعامل من عيلتي على إني عالة وحالتي حالة
ثقتي بنفسي راحت النجاح بقى إستحالة
نفسي أهرب من نفسي ومن حالتي ومن عيلتي ومن الدنيا
نفسي ألقى دنيا ثانية أهرب ليها لو حتى ثانية
وفي يوم قالها لي صاحبي واللي يدلك على الطريق
ما يفيدش صاحب غير صاحبه، إسمع من الصديق
قال لي في قعدة ضرب حلوة بالليل عاملينها
سألته هاش؟ ضحك، قالي "بيسة" قلت له لا أدمنها
قال لي ما تخافش، مش ممكن تدمن من أول شكة
أقنعني، بالليل فعلاً شككني أول شكة
مفاصلي ساحت وإرتاحت وروحي راحت
بكلم نفسي من جوة وبرغي ومن برة ساكت
همومي شبه تاهت والرؤية باهت في باهت
كل مشكلة كانت عندي في الدنيا ماتت وتاهت

عدّت ساعات في ثانية لقيت الصحبة قايمة
دخلت بيتي وش الفجر عيلتي كانت نايمة
دفنت نفسي تحت البطانية جسمي متلج
نمت في أقل من ثانية نومة واحد متبنج
قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي، هي الحياة، هو، هو أنا، أنا
زهقت طهقت من الحياة تقدر تقول مليت أنا

صحيت وفقت رجعت ثاني للواقع والعكننة
عدّى النهار بطيء كإنه كام شهر وسنة
نفسي النهار يعدي بسرعة وأضرب ثاني
أرجع ملك زماني بعيد عن العالم اللي رماني
خلّوني أضرب معاهم كل يوم وبتعزم
خلاص دخلت السكة والطريق بيترسم
فاجئني صاحبي في يوم
قالها لي في وشي خف تعوم
أجيب فلوس منين ليّ وليك نضرب كل يوم
شخشخ جيبك يا من قعدتنا دي تكون محروم
من النهار ده مفيش ضرب ببلاش، مفهوم؟ مفهوم

روّحت وثاني يوم في معاد الضرب جسمي إتكهرب
كرابيج في ضهري ومناخيري سايلة وبتسرب
عاوز أضرب، منين أجيب فلوس؟ منين أجيب فلوس؟
بدأت أستلف من كل اللي أعرفه وأدوس
وحتى إخواتي خدت منهم ياما فلوس دروس
كله كرهني وبيهرب مني تقلت على النفوس
خمسين جنيه في خمسين في مية في مية
بسرق يوماتي فلوس من البيت وكله شك فيّ
نزلت بعت كل حاجة جات لي في يوم هدية
خلّصت فلوسي لحد فى يوم ما جات لي فكرة هي، هي
ذهب أمي، موبايل أختي، لاب توب أخويا
سرقتهم نزلت أهرب من البيت وقفني أبويا
حاول يمنعني مسكني من إيدي جامد زقيته
إتخبط في الحيط، و بص لي إزاي إبنه وآذيته

خذ مني كل حاجة وتربس الباب غضب
ساعتها طلبت أغرب حاجة ممكن تتطلب
عاوز فلوس حالاً يا إما حرتكب جريمة
إتهمني بالجنون وإداني كام شتيمة
ببان كل الأوض بتتفتح، عيلتي بتتفرج
لسه بيستوعبوا يمكن ده جد يمكن بنهرج
سحبت بنت أختي ثلات سنين ناحية شباك
هاتوا الفلوس لا أرميها، فجأة زاد الإرتباك
أمي بكت بحرقة قدامي فقت لثواني
رمت لي فلوس وبصوت عالي، ما أشوفش وشك ثاني
إمشي ملكش أم يا أبغض من شيطاني
خذت الفلوس وجريت عارف مش راجع بيتي ثاني

قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي، هي الحياة، هو، هو أنا، أنا
زهقت طهقت من الحياة تقدر تقول مليت أنا

خسرت كل أهلي وأصحابي بقيت وحيد
ومنين هجيب فلوس لازم ألقى طريق جديد
فجأة إفتكرت جار من سني ساكن لوحده طول عمره
أبوه في إعارة برة مصر وشهري فلوس يبعت له
شديته زي ما إتشديت أنا لنفس الطريق
لقيت مصدر فلوس جديد وبيت ولقيت صديق
نضرب سوا بفلوسه وفي بيته وملناش ظهور
شقى سنين أبوه خلص كله في أربع شهور
وفي ليلة بنضرب جات له مكالمة ما صدقهاش
أبوه عرف إن إبنه بيسرقه وإتنقل الإنعاش
كل عصب في جسمي إتوتر، زودت الجرعة أكثر
الجرعة المعتادة خلاص ما بقيتش تأثر

شريط حياتي بيتعرض قدامي أغبر في أغبر
ضربت السم في عروقي زودته أكثر وأكثر
نفسي أفنى وأخلص من الدنيا زي المية أتبخر
كمان زودت سِنة جسمي كله إتلون أصفر
صاحبي إتفزع قام وإتسرع، مالك أصفر ليه يا جدع
جسمك عرقان وبتترعش زي اللي من الحية إتلدع
رغم إني غرقان في العرق، جسمي متلج موجوع وجع
من خضتي جيت أصلب طولي، جسمي على الأرض إترزع
جسمي رافض لكل أمر مني القوة إتهدت
والدنيا بتضلم تدريجي و واحدة واحدة إسودت
آخر لقطة في حياتي شفتها كانت مأساة
صاحبي مرعوب وبيراقب فراقي للحياة

قطر الحياة بيعدي بسرعة، سنة في سنة في سنة
وأنا زي ما أنا من لما كان عندي سنة
هي، هي الحياة، هو، هو أنا، أنا
زهقت طهقت من الحياة تقدر تقول مليت أنا

عمري بسرعة إنتهى
رجعت شريط حياتي ما لقيتش فيه حاجة عدلة تتذكر لي عملتها
حياتي راحت مني كلها ضيعتها
ندمان على كل لحظة غامقة في يوم أنا عشتها
يا ربّ إديني فرصة ثاني أرجع للحياة
حمشي في طريقي صح لحد آخر منتهاه
دي حاجة صعبة فعلاً إنك تختفي من الدنيا
والناس ما تفتكركش بحاجة حلوة لوجه الله